Mir Waggis sin jo e bsunderi Sippe

riskiere mänggmol e dicki Lippe

und wippe mit de Rippe bis mir usflippe

me könnt meine mir hän d'Schweinegrippe

 

Mir sin aber bi witem nit die einzige Fäll

anderi z'nenne isch eifach und goht schnäll

dr Gmainrot Morat isch sicher au infiziert

so wie är gege d'Bounty argumentiert

 

Uff em Sportplatz Im Brühl, hän mir vernoh

het au e Awohner das fiese Virus abbiko

do seht ein rot, will ihn dr Lärm tuet wecke

und wött die Speakeralag grad niederstrecke

 

Bi de Verkehrsplaner isch e Epidemie usbroche

das Chaos bringt d'Dorfbewohner zum koche

womi ein frogt wie är zum Bahnhof cha go

hani gseit: "do hätsch besser s Velo gno!"

 

Bi dr Polizei hän mir e Streifewage im Verdacht

e bestohlene Taxifahrer het konkreti Ussage gmacht

wär e halb Stund brucht um an Tatort z glange

het sich bestimmt au irgend e Virus igfange

 

Ihr sind nit die schnällschte liebi Staatsagstellti

sind eher so bits wie dampfendi Gschwellti

denn für ei Tescht bruchet ihr dreimol so viel Zit

wie dr Dokter Viollier - das glaubsch fascht nit!

 

Lueget nit umme d Sau goht umme

leg d'Schutzmaske a und tue di vermumme

halt fünf Meter Abstand vo däm näbe dra

är könnti nämlig d'Schweinegrippe ha