2009

 

Nit emol uff em Friedhof hesch di Rueh

Bi däm Fluglärm bikunsch kai Aug me zue

 

 


Die neui Mässstation dört bim Friedhof hinde

Bewiest was mir Schwellemer scho lang empfinde

Es isch zwar nüt Neus aber trotzdäm gstört

Dass me in Schwellheim die Flieger eso lutt ghört

 

Dä Fluglärm s isch doch nit zum glaube

Tuet uns Schwellemer dr Schloof no raube

Mir tüen uns scho sit Joohre beklage

Aber d Regierig het do nit viel z sage

 

Bim Friedhof het jetzt Gmeind e Mässstation errichtet

Es hän alli gläse, s AWB het au scho drüber brichtet

Und scho am erschte Tag, wo sie de Flugis tuet zuelose

Isch dr Pegel scho über s Ziel use gschosse

 

Wieso stellt me die Mässtation denn nunde Fahne

Überhaupt bim Friedhof zu de Tote ane

Die Tote wurds doch gar nit störe

Sie könne dä Lärm sowieso nit höre

 

Es sig nit so schlimm, isch do vom Airport z höre

Und tuet doch gar nit wirklig störe

S Wätter und au dr Wind sige immer d Schuld

Aber langsam verliere mir doch d Geduld

 

Dr Wecker schalt ich scho lang nümm ii

d Air Canada düst nämlig rächtzitig verbi

Dä Saulärm weckt sogar die Tote

Vo Schwellheim bis nach Chloote

 

Bim z Morge bi Kaffi und Gipeli, machi mini Zitig uff

"Frachtflugzeuge: Nur 75 Dezibel" - das macht mi muff

Öb British Airways, Air Berlin, Balair oder Swiss

Die veröffentliche Zahle sin e riese Bschiss

 

Au dr Mittagsschlof wird abrupt unterbroche

Will ein vo dr Air France duet durebloche

Statt Schöfli zelli Flugzüüg oder Stewardesse

Denn au bim iischlofe tuet mi dä Lärm no stresse

 

Und wöttsch denn ändlig di Füüroobe gniesse

Isch sicher s'Letscht wo no willsch höre miesse

Dass ei Flugi nach em andere über dini Hütte brätscht

Bis wieder emol eins in e Eschtrich ine dätscht

 

Und ligsch denn zobe ändlig gmüetlich in dim Bett

Mainsch ein bearbeitet mit em Prässlufthammer si Parkett

Denn kasch sicher si, will das isch garantiert

e Frachtflugzüüg wo grad di Dach frisiert

 

Zurück                     Zurück