2008

 

Dr Schwellheim Park

 

 


D'Wägmatte sinn widr im Rampeliecht

Wär schön wenn d'Gmeind mol öbbis miecht

Wo nit nur wirtschaftlich muess rentiere

Sondern au uns Iiwohner duet imponiere

 

Bim Slalom um die Hundeschiss

Hol ich mir fascht e Bänderriss

Mir fändes eifach mega stark

Gäbs dört emol e Schwellheim Park

 

Statt Wildwuchs, Furche und au Rille

Das isch doch ächt e bitteri Pille

Mit Fantasie gäbs do tolli Sache

Wome für uns Schwellemer könnt mache

 

Anstell vo uffgspiesste Politikerbiire

Und Robidogsäck wo s'Gländ verzi

Wäre Grüenfläche, Bäum und Bänk

Für unseri Bevolkerig s'grössere Gschänk

 

Für Sport, Kultur und witeri Attraktione

Würd sich das Brachland au no lohne

E Abentüür-Spielplatz mit Jugendagebot

Und e Grillstell fände mir au no flott

 

Zum picknicke oder eifach zum entspanne

Im küehle Schatte vonere grosse Tanne

Dänk ich mir Palme und e schöne Strand

Das isch doch besser als e Betonwand

 

E Platz für Familie und Kinder wo lache

Ruum für Begegnig, e Fescht und so Sache

E botanische Garte und Tier zum bestuune

Das verbreitet unterm Volk e gueti Luune


Zurück                     Zurück